PROGRAMA

1. Goizetan lehen saioan erlaxazio ariketak egingo ditugu egunero eta guztiok . LH5-6n yoga saioak izango dituzte.
2. Errezeta osasuntsuak: jasoko ditugu bai hamaiketakoak, bai otorduak, bai askariak…Ondoren liburuxka bat osatuko da: Zaraguetako errezeta osasuntsuak
3. HH ko ikasleekin masajeak egingo dira
4. Juan Zaragueta piramide nutrizionala.Piramidea osatzeko aurreko asteburuko menuak izango ditugu kontuan. DBHn dieta osasuntsuaren garrantzia landuko da geletan.
5. Hamaiketakoen erronka.LH4,5,6 bultzatzaileak izango dira. Grafikoan jasoko dira erronkaren emaitzak eta eskolan egongo dira ikusgai.
6. Gorputz-masaren indizearen kalkulua DBHn.
7. Gorputz hezkuntza saio bereziak. Mezu bereziak zabaldu, oinez etorri , bizikletaz… Loaren garrantzia.

• HHn dantza
• LH1-2 Zarautzko itzulia. LH3 irteera. LH4-5-6 errubgy saioak
• DBH dantza eta gorputz adierazpena sentimenduak adierazteko (DBH1-2).
• Tutoretzetan loaren garrantzia

8. Osasun mentala. Umorea landuko da eguneko momenturen batean

Honen bidez, azalpenak eman nahi dizkizuegu eskolako jolas-parkeko paretan gertatu den ezbeharrari buruz. Jakingo duzuen bezala, gure jolas-parkearen ondoko partzelan etxeak eraikitzen ari dira eta obra-eremua da gaur egun. Egun hauetako haizeteak eta euriak kalteak eragin ditu jolas-parkea eta obra-eremua bereizten dituen paretan eta, ondorioz, parkeko zati bat, segurtasunagatik,  ezin dute erabili  gure umeek.

Orioko Udalarekin harremanetan jarri gara eta haiek berehala hitz egin dute obraren arduradunekin. Obraren arduradunek hau adierazi diote Udalari:

• Barkamena eskatzen dute ezbeharragatik eta lehentasun osoa emango diote arazoa konpontzeari eta eskolako eguneroko martxa ahalik eta azkarren berreskuratzeari.
• Berehala erretiratuko dute eroritako pareta eta indartu egingo dute behin-behinekoz jarritako hesia.
• Ondoren hasiko dira zimendua hormigonatzen eskolako mugetan (egunean hamar metro hormigonatzea aurreikusten dute).
• Behin inguru guztia hormigonatuta, pareta prefabrikatuak jarriko dira aurrena eta, azkenik, eskolako itxitura berregingo dute.

Jakinaren gainean egoteko bidaltzen dizuegu informazio hau. Gaiaren segimendua gertutik egiten ari gara eta espero dugu, esanda bezala, azkar konpontzea.

Udaletxeak jakinarazi digu, Covid 19ak Orio herrian eragindako egoerak hobera egin duenez,  Orioko udalak Udal Zerbitzu Publikoak berriz ere, irekiko dituela: kiroldegia, kultur etxea, parkeak, etab.

Beraz, eskolako instalazioak ere, (parkea, frontoia eta kantxak) eskola orduz kanpo irekiko dira.

Eskola egutegian azaltzen den bezala, jai eguna dugu otsailaren 15ean, astelehena, HH eta LHn.

DBHko ikasleek berriz, otsailaren 15 eta 16ean, astelehena eta asteartea, izango dute jai.

Guraso agurgarriak,

Azkar doa denbora! Ezta?

Ohartzerako iritsi zaizue zuen seme-alaba eskolaratzeko garaia. “Atzo jaio zela ematen du eta!” pentsatuko duzue, haurra azken aldian zenbat koskortu den sinetsi ezinik.

Zaragueta Herri Eskolatik idazten dizuet, kalitate goreneko doako hezkuntza lantzen duen Orioko eskola publiko bakarretik. Bertako  edukietatik hasita,  mundura irekitako hezkuntza-proiektu euskalduna du ardatz gure eskaintzak.

Gizartearen etengabeko eraldaketaren erronkei aurre egiteko prestatzen dugu ikaslea txikitatik. Gurean, konfiantzazko familia giro goxoan ikasiko du irakurtzen eta idazten, margotzen, teknologia berriak erabiltzen edo musikaz gozatzen, baina batez ere, egunerokoan errespetuz elkar bizi eta zoriontsu izaten.

Zaragueta Eskolan ikasle bakoitzari eskaintzen diogu arreta berezi eta pertsonalizatua. Hori da gure indar-gune nagusia: hezkuntza-prozesua ikaslearen sentimendu eta emozioetara egokitzeko dugun gaitasuna.

Ikastetxearen instalazio ederrak ingurune lasai eta berdean daude kokatuta. Natura gertu usain daiteke eskolako edozein txokotik. Jolas parkeak, frontoi estalia eta kirol pistek aukera paregabea eskaintzen dute.

Zaragueta Eskolak, gainera, zerbitzu zabalak ematen ditu, jangela subentzionatua, doako autobusa, ikaslearen zaintza-zerbitzua edo jarduera osagarriak, zenbait aipatzekotan. Publikoa denez, ikaslea eskolan hezteko ez da hileroko kuotarik ordaindu behar. 

Gutunean gure hezkuntza proiektua sartu dizuegu, eskolari buruzko informazio gehiagorekin. Nolanahi ere, zuekin aurrez-aurre egon eta elkar ezagutzeko ate irekien jardunaldia egingo dugu urtarrilaren 16ean,  10:30etik 12:30era.

Gainera, urtarrilaren 20an, asteazkenean, bilera informatiboa ere egingo dugu eskolaren xehetasunak patxadaz azaltzeko. Arratsaldeko 18:00etan izango da aurkezpena eskolan bertan, eta informazioa elebitan eskainiko da.

Ate irekien egunean, bertan seme-alaben aurre matrikula egiteko aukera ere izango duzue. Horretarako, familia-liburua eta gurasoen NANa beharko ditugu.

Covid-19ren aurrean, prebentzioaren, higienearen eta osasunaren sustapenaren oinarrizko printzipioak direla eta, maskararen erabilera horrelako izango da:

• Ikastetxeko langile eta ikasle guztiek maskara nahitaez erabiliko dituzte espazio guztietan eta une oro, HHko ikasleak salbuespen.
• Eskola-garraio kolektiboan derrigorrezkoa  da maskara erabiltzea. Autobusen barruan ezin izango da maskara kendu.
• Maskara nahitaez erabili beharko da, nahiz eta ikasleak eserita egon eta 1,5 metroko pertsonen arteko distantzia gorde.
• Jangelan derrigorrezkoa da maskara erabiltzea, eta maskara kenduko da bakarrik jan eta edateko momentutan.
•  Mugimendua, kantua edo antzekoak eskatzen dituzten irakaskuntza-jardueren kasuan, maskara erabili eta pertsonen arteko distantzia mantendu beharko da.
• Populazio osasuntsuarentzat gomendatutako maskara higienikoa erabiliko da, eta ahal den guztietan berrerabilgarria eta homologatua

Derrigorrezko Bigarren Hezkuntzako 3. eta 4. mailako ikasleen ikasturte hasira data aldatu egin da. Aurkezpena irailaren 14an 11:00etan izango da.

Ikasturte hasierarako hainbat ohar:

• Bizi izan dugun ezohiko egoera eta hurrengo ikasturteko berezitasunak kontuan izanda, familiekin ikasturte hasierako bilerak iraileko lehenengo astean egingo dira. Atxikitzen dizuegu bileren egutegia. Zuen presentzia ezinbestekoa da bilera horietan inoiz baino gehiago.

• DBHkoek irailaren 7an goizeko 11:00-12:00etara aurkezpena izango dute.
• Eskolako egutegia web orrian ikus dezakezue. Aurtengo egoera berezia dela eta, hezkuntza sailak eskainitako aukerari helduz, eta organo gorenaren onespenarekin, aurten ordutegi trinkoa izango dugu ikasturte osoan. Aplikazioa ez dago prestatuta aldaketa horiek onartzeko eta horregatik ez dira ondo azaltzen egutegian.

Beti bezala, jakin ezazue edozein zalantza argitzeko eskolara deitzea nahikoa dela 943899243

OHARRA: LH1etik aurrera ikasle bakoitzak musukoa ekarri behar du etxetik eta eskolako eremuetan erabilera derrigorrezkoa da.